អន្តរជាតិ៖ អាជ្ញាធរនៃរដ្ឋ Arkansas បានឱ្យដឹងកាលពីថ្ងៃអាទិត្យថា បុរសម្នាក់បានស្លាប់ និង២៧នាក់បានរងរបួស នៅពេលដែលមនុស្សពីរនាក់បាញ់ប្រហារគ្នាដោយកាំភ្លើងក្នុងអំឡុងការតាំងបង្ហាញរថយន្តដែលជាផ្នែកមួយនៃព្រឹត្តិការណ៍សហគមន៍ប្រចាំឆ្នាំនៅក្នុងទីក្រុងតូចមួយភាគអាគ្នេយ៍រដ្ឋ Arkansas។

មនុស្សម្នាក់ដែលបានចាកចេញពីកន្លែងកើតហេតុនៃការបាញ់ប្រហារកាលពីល្ងាចថ្ងៃសៅរ៍ត្រូវបានចាប់ខ្លួនដោយចោទប្រកាន់ហើយកំពុងត្រូវបានសាកសួរអំពីការបាញ់ប្រហារនៅទីក្រុង Dumas។

ប៉ូលីសរដ្ឋក៏បាននិយាយផងដែរថា កុមារជាច្រើននាក់ស្ថិតក្នុងចំណោមអ្នករងរបួស ក្នុងនោះពីរនាក់មានអាយុក្រោម ២ខួប។

ការតាំងបង្ហាញរថយន្តគឺជាផ្នែកមួយនៃព្រឹត្តិការណ៍សហគមន៍ដែលប្រារព្ធឡើងនៅនិទាឃរដូវនីមួយៗដែលហៅថា Hood-Nic។

បើតាមប្រភពដដែល មនុស្សចំនួន ៦នាក់ដែលមានអាយុក្រោម ១៨ឆ្នាំដែលត្រូវបានរងរបួសដោយការបាញ់ប្រហារត្រូវបានបញ្ជូនទៅមន្ទីរពេទ្យកុមារArkansasក្នុងទីក្រុង Little Rock។

លោក Wallace McGehee ដែលជាអ្នករៀបចំកម្មវិធីរថយន្តបានឱ្យដឹងថា នៅពេលដែលលឺស្នូរគ្រាប់កាំភ្លើង គាត់ចាប់ផ្តើម «រត់លោតចុះក្រោមព្យាយាមយកក្មេងៗចេញពីផ្លូវ»៕